Спасувачките служби трагаат по осум исчезнати членови на екипажот на танкерот „Wine Trader“, на кој во текот на ноќта избил пожар во романските територијални води на Црното Море, откако руски дронови навлегле во романскиот воздушен простор, соопштија романски официјални лица.
Романските власти засега не го поврзаа директно пожарот на бродовите со руските дронови.
Сепак, инцидентите се случија по нападите со дронови врз најмалку пет други товарни бродови во близина на бреговите на Романија и соседна Бугарија, исто така членка на НАТО, во изминатите десет дена.
Романската поморска управа соопшти дека примила повик за помош од танкерот „Wine Trader“, кој плови под знамето на Сан Марино.
Од вкупно 12 членови на екипажот, осум се водат како исчезнати, додека четири лица се на безбедно.
Претходно избил пожар и на нафтениот танкер „Yara J“, кој плови под знамето на Коморите. Романските власти првично соопштија дека не е јасно дали бродот бил цел на напад. Сите членови на неговиот екипаж се на безбедно.
Сè почестите напади врз поморскиот сообраќај во Црното Море, поврзани со руско-украинската војна, во последните месеци го зголемуваат ризикот од глобални прехранбени кризи, бидејќи двете земји се меѓу најголемите извозници на жито во светот.
Русија ги бомбардира украинските црноморски пристаништа, поради што Киев сè повеќе се потпира на дунавските пристаништа и поморските рути долж бреговите на Бугарија и Романија.
Украина, од друга страна, напаѓала руски бродови во близина на устието на реката Дон во Азовското Море.
