Соединетите Американски Држави (САД) упатија честитки на Студентската листа и граѓаните на Србија за парламентарните избори одржани на 25 октомври.
„Се радуваме на уредна транзиција на власта и заедничка работа за унапредување на стратешкото партнерство меѓу САД и Србија, како и регионалната стабилност“, соопшти амбасадата на САД во Белград во објава на мрежата Икс.
САД беа едни од ретките западни сили што не се огласија по победата на студентите над власта на Александар Вучиќ.
Студентската листа ја победи листата предводена од Вучиќ со околу половина милион гласови предност.
Предвремените парламентарни избори во Србија следуваа по речиси две години студентски протести, што почнаа по падот на настрешницата на железничката станица во Нови Сад во ноември 2024 година при што загинаа 16 луѓе. Барањата за одговорност за трагедијата прераснаа во пошироко движење против корупцијата и начинот на владеење. Студентската листа меѓу своите кандидати на листата вклучи експерти, свои професори, спортисти, земјоделци и уметници, а не само претставници на студентското движење.
Падот на Вучиќ и СНС доаѓа по 14 години откако тој дојде на власт во 2012 година.
Првично, беше вицепремиер две години во владата на Ивица Дачиќ. Во 2014 стана премиер, а на таа функција остана до 2017. Тогаш, ја напушти премиерската позиција и стана претседател на Србија. Откако имаше два претседателски мандати што е максимум според Уставот на Србија, тој си поднесе оставка за да се обиде повторно да стане премиер и се кандидираше како носител на листата „Обединета Србија“ на СНС.
