Светската здравствена организација (СЗО) предупреди дека светот до 2030 година ќе се соочи со недостиг на медицински персонал, со оглед на тоа што една четвртина од лекарите ќе се пензионираат во следните 10 години.
„Во многу земји, и нашето население и здравствените работници стареат истовремено. Ова би можело дополнително да го влоши проектираниот глобален недостиг од 11,1 милиони здравствени работници до 2030 година“, се вели во соопштението на СЗО придружувано од сеопфатен извештај за трендовите на здравствената работна сила, врз основа на податоци од повеќе од 100 земји.
До 2030 година, се проценува дека 67 земји нема да имаат доволно здравствени работници за да ги одржат своите тековни стандарди за здравствена заштита, според СЗО.
„Потребни се дополнителни 832.000 здравствени работници за да се одржи сегашното ниво на здравствен персонал во однос на бројот на населението“, наведува извештајот.
Во посиромашните земји, ова би можело да ја зголеми зависноста од здравствени работници од странство, што потенцијално би можело да влијае на стандардот на здравствената заштита во тие земји.
Земјите со повисоки приходи, вклучувајќи многу европски земји, би можеле да бидат меѓу најтешко погодените, бидејќи имаат поголем процент на постари здравствени работници, предупредува СЗО во извештајот.
Во овие земји, се проценува дека еден од тројца лекари ќе се пензионира во следните десет години.
