Телевизијата Н1 денес објави дека одбила да му дозволи на Александар Вучиќ, носител на листата „Единствена Србија“ да гостува како дел од предизборното претставување на изборните листи поради неговиот однос кон телевизијата во годините претходно, но дека се отворени за интервју по изборите, што за Вучиќ е „фашистичка“ одлука.
„Поради фактот што Александар Вучиќ со години одбиваше да дојде во телевизијата Н1, а покрај тоа, сите овие години нè навредуваше, нè нарекуваше ѓубре, терористи, странски платеници и нè навредуваше на сите други начини, па дури и обвинувајќи нè за поттикнување насилство и уништување на државата, уредничкиот тим на Н1 одби да му дозволи тој да ја презентира листата,“, соопшти редакцијата на Н1.
Телевизијата нема проблем да дозволи друг претставник на Српската народна странка(СНС), партијата на Вучиќ, да ја претстави листата во среда, кога е понуден термин. СНС, додадоа тие, беше поканета да испрати друг претставник, во времето закажано за претставување на нивната листа.
„Секогаш сме подготвени да разговараме со Александар Вучиќ, но по изборите на 25 октомври, кога ќе процениме дека е вистинско време и дека има причина тој да се појави во нашата програма“, објави телевизијата.
Телевизијата Н1, исто така, објави дека без нивно знаење, бил снимен разговор помеѓу раководителката на информативната служба на СНС, Владанка Маловиќ, и уредникот Бранислав Шовљански, кој потоа бил емитуван на неколку телевизиски станици. Разговорот бил снимен без знаење на Шовљански.
По таа објава, Ана Брнабиќ, претседателка на Парламентот и вршител на должноста претседател на Србија, изјави дека од 250-те кандидати на листата „Единствена Србија“, секој може да се појави на Н1, но дека „тие толку се плашат од Вучиќ што тој сам не може да добие 24 минути за да ја презентира програмата на својата листа“.
„Ако не ги сакаме тие нацистички методи од уредниците на Н1, тогаш дури и не мора да ја презентираме нашата листа“, рече Брнабиќ, додавајќи дека таа лично не гледа како би можела да биде гостинка на таа телевизија во иднина, но дека одлуката ќе се донесе на ниво на СНС.
Самиот Вучиќ зборуваше за ситуацијата на предизборен митинг во спортска сала во Чачак, каде рече дека е „најгорд на светот што го забраниле“, додавајќи дека „нема ништо што можат да му направат затоа што го има народот на Србија на своја страна“.
„Тие мислат дека ќе победат правејќи го ова, мислат дека ќе забранат различно мислење правејќи го ова. Десет години лажат за мене и моето семејство, а јас само сакав да им кажам за 24 минути колку лаги кажале и колку ми е грижа за Србија, колку нови фабрики, болници и патишта ќе изградиме. И не можат да издржат 24 минути наспроти десет години лаги“, рече Вучиќ.
„И ова, ова, ќе видите, ќе ги налути луѓето, буквално ќе ги налути луѓето. Ништо нема да ги налути луѓето како ова. Ова е чист фашизам“, додаде Вучиќ.
Односот меѓу Вучиќ, и независната телевизија Н1 (регионален партнер на CNN) долги години е исполнет со меѓусебни обвинувања за цензура, пропаганда и непрофесионализам. Додека Вучиќ и неговата партија ја карактеризираат Н1 како „опозициски медиум“ кој води кампања против него, Н1 и независните новинарски здруженија посочуваат дека власта врши постојан притисок и дискриминација врш нивните новинари.
Власта во Србија ја користи секоја прилика да ја претстави Н1 како медиум во сопственост на „странски капитал“ или под влијание на опозициските лидери. Од друга страна, новинарите на Н1 континуирано известуваат за афери поврзани со корупција, притисоци врз гласачите, состојбата со владеењето на правото и медиумските слободи во Србија.
Пред неколку дена, десетина истакнати новинари дадоа отказ од Н1, во момент кога редакцијата на порталот „Нова.рс“, кој е под иста медиумска групација со телевизијата Н1, објави дека е изложена на притисок од раководството бидејќи одбива да прифати наметнување на нов главен уредник бидејќи стравува дека тоа би претставувало чекор кон задушување на независното новинарство.
Парламентарните избори во Србија се закажани за 25 октомври. Вучиќ даде оставка од функцијата претседател на Србија и сега се бори за премиерска позиција.
