Претседателот Доналд Трамп рече дека американските сили ќе продолжат да го напаѓаат Иран „многу силно“ во следните две или три недели и ќе ја вратат земјата „во камено доба“.
Во своето прво обраќање до нацијата од почетокот на конфликтот, Трамп рече дека целите на САД се „приближуваат кон завршување“ по недели, како што ги опиша како „брзи, решителни, убедливи победи на бојното поле – победи какви што малкумина досега виделе“.
Трамп вели дека Иран ќе продолжи да се соочува со бараж од напади на краток рок и го пофали успехот на американските операции тврдејќи дека сите цели на Вашингтон досега се исполнети или надминати.
„Ќе ги удриме исклучително силно во следните две до три недели. Ќе ги вратиме во камено доба, каде што им е местото“, изјави американскиот претседател.
Трамп не кажа ништо за преговорите со Иран, ниту го спомена рокот од 6 април што му го постави на Иран да го отвори Ормускиот теснец, критичниот воден пат за глобалниот транспорт на нафта и гас. Тој се закани дека ќе ја нападне енергетската инфраструктура на Иран, доколку теснецот не биде повторно отворен. Тој исто така, не понуди јасен пат за ставање крај на прекините во снабдувањето што ги зголемија цените на енергијата. Тој исто така не ја спомена можноста за испраќање американски копнени трупи во Иран, или во НАТО.
Првиот човек на САД ја бранеше војната како неопходна за да се спречи Иран да се стекне со нуклеарно оружје.
„Овој крволочен режим неодамна уби и 45.000 свои луѓе. За овие терористи да имаат нуклеарно оружје би било неподнослива закана“, рече Трамп осврнувајќи се на задушувањето на протестите во Иран.
Тој го повтори своето тврдење дека Иран е „точно на прагот“ да се стекне со нуклеарно оружје и рече дека неговата ракетна програма на крајот би можела да ги загрози Соединетите Држави, Европа и другите региони.
Иранската команда на Хатам ал-Анбија објави дека САД и Израел, и покрај досегашните напади, немаат вистинска слика за воената моќ на Иран и дека нивното разбирање за можностите на Иран е погрешно. Во соопштение пренесено преку агенцијата Тасним, тие велат дека противниците „не знаат ништо“ за ширината и стратешката длабочина на можностите на Иран.
Иранската страна тврди дека клучните центри за производство на стратешки ракети, беспилотни летала со долг дострел и прецизни напади, како и модерни системи за противвоздушна одбрана, електронско војување и друга специјална опрема, не се уништени. Според ова тврдење, стратешкото воено производство се одвива на локации за кои противниците не знаат и кои, според нив, „никогаш нема да можат да ги достигнат“, додека досега погодените цели се опишани како „незначителни“.
По говорот на Трамп, нафтата поскапе за повеќе од 4%, а азиските акции паднаа. Суровата нафта скокна за 4,9% и изнесува 106,16 долари за барел. Референтната американска сурова нафта порасна за 4% или 104,15 долари за барел.
Инвеститорите купуваа акции во претходните денови со надеж дека може да има деескалација, па јапонскиот пазар забележа силно зајакнување оваа недела. Но, говорот на Трамп не понуди јасна временска рамка за крај на конфликтот или решавање на проблемот околу Ормускиот теснец, што брзо врати страв на пазарите и предизвика ново повлекување од ризичните средства.
