Предвремените парламентарни избори во Србија, одржани на 25 октомври, на кои доскорешниот српски претседател Александар Вучиќ го призна поразот на владејачката партија и победата на студентското движење, сè уште не се формално завршени.
По одлука на Републичката изборна комисија (РИК), гласањето ќе биде повторено на 53 избирачки места, што ќе ја одложи постизборната процедура за формирање нова власт.
Според одлуката на Републичката изборна комисија, на 1 ноември ќе се гласа на избирачките места на кои не било можно да се утврдат резултатите или гласањето било поништено со одлуки на локалните изборни комисии.
Со повтореното гласање ќе бидат опфатени 24.438 гласачи, а исходот не може значително да ги промени изборните резултати.
Врз основа на обработени 97,56 отсто од избирачките места, РИК утврди дека победничката листа на студентското движење има предност од повеќе од 582.000 гласови.
Студентската листа „Студентите победуваат“ ја добила поддршката 52,71 отсто од гласовите, и ќе освои 140 пратенички мандати, а листата „Александар Вучиќ – Обединета Србија“ освоила 39,17 отсто и ќе има 104 пратеници во парламентот.
Повторувањето на гласањето на 1 ноември, од 7 до 20 часот, ќе ја одложи постизборната процедура за формирање нова власт. Таа започнува со прогласувањето на конечните резултати, по што почнува да тече рокот од 30 дена во кој мора да се одржи конститутивната седница на Собранието.
Со потврдувањето на пратеничките мандати и конституирањето на парламентот започнува нов рок од 90 дена, во кој пратениците треба да изберат влада.
