Низ Венецуела расте фрустрацијата поради недостигот на владина помош во подрачјата погодени од двата смртоносни земјотреси пред пет дена, додека чудесните спасувања се сè поретки, а бројот на жртвите во понеделникот надмина 1.700 лица.
Меѓу жртвите се верува дека има и до 140 лица депортирани од Соединетите Држави, вклучувајќи и деца, кои престојувале во хотел што беше урнат од последователните земјотреси со јачина од 7,2 и 7,5 степени според Рихтеровата скала во средата.
На петтиот ден од спасувачките напори, владиниот биланс покажа речиси 200 целосно срамнети со земја згради и неколку стотици тешко оштетени. Според експертите, зголемениот број на жртви, вклучувајќи и 5.000 повредени, веројатно бил влошен од децениското запоставување, лошото спроведување на градежните прописи и неквалитетните пракси за издавање дозволи за време на поранешните лидери Уго Чавез и Николас Мадуро, јавува новиснската агенција Ројтерс.
Во Ел Хункито, мал планински регион на околу 33 километри (20 милји) западно од Каракас, каде што Венецуелците често летуваат за време на викендите, жителите велат дека виделе малку јавни функционери, додека земјоделците и другите граѓани самите обезбедуваат основни залихи за заедницата.
„Чекаме одговори, чекаме да се расчистат урнатините, да се направат инспекции“, рече Кејли Ибара, 33-годишна маникирка која ги предводи поплаките на граѓаните до властите. Таа ја повика владата да го направи „она што мора да се направи“.
Трговскиот центар во Ел Хункито е во голема мера уништен од земјотресите, а срушените згради беа видливи и за време на посетата на Ројтерс. Неколку жители кои немаат каде да одат поставија шатори на отворено поле, и покрај ризикот што го претставуваат оштетените и урнатите згради во близина.
„Не знаеме каде ќе нè сместат ниту колку долго ќе бидеме тука“, рече Тони Абреу, сопственик на локална продавница за бонбони, кој живее во шатор од земјотресите бидејќи неговиот дом и бизнис не се безбедни.
Сигнализирајќи за растечките тензии околу политиката во напорите за закрепнување, лидерката на опозицијата Марија Корина Мачадо изјави дека венецуелската влада го блокирала нејзиниот влез од Панама, но дека е решена да најде начин да се врати за да им помогне на жртвите.
Мачадо се сметаше за веродостоен противник на Мадуро, но соборувањето на Мадуро од страна на администрацијата на Трамп во јануари доведе до тоа неговата потпретседателка Делси Родригез да ја преземе власта, со поддршка од Вашингтон. Администрацијата на Трамп побара од Мачадо да го одложи своето враќање.
„Во овој момент, подготвена сум да направам сè што е потребно, да разговарам со кого и да треба да разговарам, со цел да координирам и да му служам на нашиот народ“, рече Мачадо во видеото објавено на Х.
Меѓународната заедница се обедини за да ѝ помогне на Венецуела да се справи со катастрофата, при што поголемиот дел од помошта е насочен кон Ла Гваира, сојузната држава која е најтешко погодена.
