Консултациите во пресрет на конституирањето на Собранието на Србија, одржани во петок, 13 ноември, завршија без конкретен договор меѓу партиите и листите што ќе бидат дел од новиот парламентарен состав. Средбата, најавена како консултации за идниот број потпретседатели на Собранието, како и за структурата на собраниските комисии и другите тела, заврши со критики од досегашната владејачка Српска напредна партија (СНС).
Напредњаците очекуваа овие прашања да бидат решени со меѓупартиски договор, додека Студентската листа, како ново парламентарно мнозинство, одлучи раководните позиции во собраниските тела да се утврдат на самиот ден на конституирањето на Собранието, на 17 ноември.
Во меѓувреме, претставниците на Студентската листа „Студентите победуваат“ денеска соопштија дека претседателот и потпретседателите на Собранието на Србија, како и претседателите на собраниските комисии, ќе бидат избрани со јавно гласање и со мнозинство гласови на конститутивната седница на 17 ноември. Составот на комисиите ќе биде пропорционален на големината на пратеничките групи.
На денешните консултации во Народното собрание на Србија, покрај Марио Рељановиќ и Александар Чупиќ, претставници на Студентската листа, присуствуваа и Ана Брнабиќ и Миленко Јованов од листата „Обединета Србија“, генералниот секретар на Народното собрание, Срѓан Смиљаниќ, како и претставници на малцинските листи.
„Во врска со формирањето на Комисијата за верификација на мандатите, другите листи беа информирани за ставот на Студентската листа дека процесот треба да заврши што е можно побрзо и поефикасно. За конечниот договор за членовите на оваа комисија, собраниската администрација ќе биде навремено известена“, соопштија претставниците на Студентската листа.
На денешните консултации претставниците на Студентската листа побарале конститутивната седница да продолжи веднаш по верификацијата на мандатите.
„На претставниците на другите листи им беше соопштено дека претседателот на Народното собрание, бројот на потпретседатели и нивните имиња ќе бидат избрани со мнозинство гласови на седницата. Бидејќи нашата пратеничка група демократски разговара за сите прашања и на истиот начин носи одлуки, јавноста навремено ќе биде информирана за можноста одреден број потпретседателски места да им бидат отстапени на другите пратенички групи“, соопштија од Студентската листа.
Тие додадоа дека претставниците на сите листи се согласиле гласањето да биде јавно.
„Собраниските комисии ќе имаат состав пропорционален на големината на пратеничките групи, а за нивните претседатели ќе се одлучува со мнозинство гласови во секоја комисија одделно. Членовите на меѓународните делегации ќе бидат определени врз основа на предлог на претседателот на Собранието, кој претходно ќе се консултира со претседателите на пратеничките групи, согласно член 26, став 2 од Деловникот“, наведоа претставниците на Студентската листа.
Тие соопштија дека побарале да им биде доставен и записникот за примопредавање на должноста меѓу генералниот секретар и претседателката на Собранието, „за да се знае што останало зад нив, во каква состојба е Народното собрание и до каде се протега нивната евентуална одговорност“. Со ова, како што наведоа, се согласиле и претставниците на другите листи, како и генералниот секретар на Народното собрание.
