Антимиграциската и кон Русија наклонета Алтернатива за Германија (AfD) го освои првото место на државните избори во североисточна Германија на изборите во таа покраина во неделата, покажаа излезните анкети, нанесувајќи и „катастрофален удар“ на партијата на канцеларот Фридрих Мерц, кој се заложи да продолжи со својата реформска агенда.
Според излезните анкети на државната германска телевизија АРД (ARD), десницата (AfD) освои 37% гласовите во сојузната покраина Мекленбург-Западна Померанија, пред Социјалдемократите од центарот на левицата кои освоија 35,5%, и далеку пред конзервативците на Мерц, кои добија 5,5% и едвај го преминаа прагот за влез во покраинскиот парламент.
Сепак, малку е веројатно дека крајно десничарската партија ќе управува, бидејќи останатите главни партии ја исклучуваат можноста за соработка со неа.
Доколку се потврди, резултатот од неделата би бил најлош во историјата на изборите на какво било покраинско ниво за партијата на Мерц уште од 1949 година. Ова е уште еден триумф за десницата (AfD) на покраинско ниво во рок од еден месец, партија која ги предводи и националните анкети на јавното мислење иако останатите мејнстрим партии ја избегнуваат.
„Ова е катастрофа“, рече Мерц во изјава за телевизијата по објавувањето на излезните анкети, но истакна дека ќе продолжи да се бори како канцелар по шпекулациите дека лошиот резултат би можел да го наведе на оставка.
Но, тој изјави дека нема намера да се повлече од функцијата по поразите што неговата партија ги доживеа на неделните покраински избори и повторно ја потврди решеноста на владата да продолжи со реформите кои би можеле да бидат болни за најголемата европска економија. Според него, економските и политичките проблеми на Германија ги прават тешките и потенцијално непопуларни реформи уште понеопходни, а не помалку важни.
На другите избори што исто така се одржаа во неделата во главниот град Берлин, крајно левичарската партија (Die Linke) освои 24,5%, додека конзервативците на Мерц добија 20%, а десницата (AfD) исто така забележа раст достигнувајќи 16%.
Резултатите од неделата можеби нема да бидат конечен удар за Мерц, кој минатата недела доби поддршка од осум конзервативци, премиери на покраини. Но, неговиот низок рејтинг, непопуларните реформи и триумфот на десницата (AfD) на претходните покраински избори во Саксонија-Анхалт ја оставија неговата иднина во неизвесност. Мерц свика партиски состанок за недела за да се разговара за понатамошните чекори.
Изборите во Мекленбург-Западна Померанија, претежно рурална покраина во поранешна источна Германија, и во главниот град Берлин, следуваат по изборите од 6 септември во Саксонија-Анхалт, каде што антимиграциската и кон Русија наклонета десница (AfD) за малку ќе го достигнеше прагот за освојување апсолутно мнозинство.
За нешто повеќе од една деценија, партијата, која бара строги мерки за депортација на странци без право на престој во Германија, обновување на енергетските врски со Русија и напуштање на еврото, се трансформираше од маргинално евроскептично движење во најпопуларна партија во земјата. Излезните анкети го истакнуваат напредокот што го направи Алтернатива за Германија последниве години и отвораат нови прашања за стратегијата на т.н. „заштитен ѕид“ (firewall), според која другите главни партии одбиваат да влегуваат во коалициски договорот со неа.
Мерц се соочува со предизвици
Избран минатата година со ветување за реформи за враќање на стагнирачката германска економија кон раст, Мерц се мачи да ги придобие гласачите, зголемувајќи го незадоволството од непопуларните пензиски, даночни и здравствени реформи проследени со низа грешки во комуникацијата, пишува новинската агенција Ројтерс.
Засега, водечките личности од ЦДУ застанаа зад него, свесни дека замената на канцеларот, што во секој случај би било тешко од уставни причини, би довела кој било наследник пред истите длабоки економски проблеми.
Но, разочарувањето од неговата влада ги одбележа кампањите и во Мекленбург-Западна Померанија и во Берлин, каде што гласачите се фокусираа на прашања како што се растечките трошоци за енергија и домување. Мерц во петокот претстави пакет за олеснување на потрошувачите, кој вклучуваше намалување на даноците на гасот и дизелот.
Неколку луѓе кои гласаа во Мекленбург-Западна Померанија изјавија дека трошоците за живот се нивна најголема грижа.
„Овде во Шверин, со овие плати, речиси ништо повеќе не можете да си дозволите“, рече гласачката Карлота Хајк за Ројтерс во главниот град на покраината.
