Новинарството постои за да поставува прашања. Да проверува факти. Да ги држи моќните под лупа и да им служи на граѓаните. Во време на брзи вести и намалена доверба во информациите, Колегиум.мк ќе се држи до оваа едноставна, но важна работа во новинарството: довербата во информациите.
Називот Колегиум.мк не е случаен. Тоа е место на дијалог, на аргументи и на различни мислења. Редакциски простор во кој новинарството се создава преку знаење, проверка и колегијална одговорност. И простор во кој фактите се поважни од мислењата, прашањата се поважни од готовите одговори, а вистината е најважна од сè.
Нашата цел не е само да бидеме уште еден извор на вести – туку тим што инсистира на одговори кога одговорите ги премолчуваат, што истражува таму каде има сомнеж и што отвора простор за информирана јавна дебата.
Целта е да отвораме и теми што често остануваат на маргините – приказни за луѓе, за локални проблеми и за одлуки што директно влијаат врз секојдневниот живот. Но, и да понудиме иновативен пристап со кој секој од Вас може да се стави во чевлите на луѓе кои заглавуваат низ системот, да ги поминете скалилата и сопките на кои секој може да наиде и да бидете едуцирани и подготвени за нив. Тоа е нашиот знак, нов начин на раскажување на новинарските приказни преку игра. Гејмификацијата на сториите ви нуди можност да научите како да ги избегнете пропустите во системот.
Колегиум.мк е создаден од тимот на македонскиот сервис на Радио Слободна Европа (РСЕ) кој згасна на 31 март – не по свој избор. Но, мисијата за слободно и одговорно новинарство продолжува. Бидејќи тимот на Колегиум.мк верува во начелото дека јавноста има право не само на наслови, туку и на објаснување. Не само на изјави, туку и на контекст. Не само на кликови, туку и на одговорност.
Нашата работа се темели на три принципи: проверка на информациите, глас на граѓаните и независност од какви било центри на моќ, бидејќи за нас јавниот интерес е поважен од сè друго.
Свесни сме дека довербата во медиумите денес не се подразбира. Таа мора повторно да се гради – внимателно, чекор по чекор.
Ве каниме да чекориме заедно.
Добредојдовте на kolegium.mk.
