Специјализираното обвинителство во Хаг, побара поранешниот претседател на Косово, Хашим Тачи, да биде прогласен за виновен и осуден на шест години затвор во случајот за попречување на правдата пред Специјализираните совети на Косово во Хаг.
Одбраната на Тачи, од друга страна, тврди дека Обвинителството не ги презентирало доказите што ја оправдуваат бараната казна и смета дека тој треба да биде ослободен од сите обвиненија.
Обвинителот Џошуа Хафец за време на своите завршни зборови рече дека „обвиненијата поднесени и докажани од Специјалното обвинителство претставуваат кривични дела“.
„Обидот за мешање во судскиот процес и негово попречување пред овој суд е закана за праведното спроведување на правдата“, рече Хафец.
Сепак, адвокатката на Тачи, Софи Менегон, ги оспори тврдењата на обвинителот, наведувајќи дека Специјализираното обвинителство бара казна за Тачи „за да ги прикрие и оправда многу инвазивните мерки што се применуваат против него со месеци“.
„Тоа вклучува тајно снимање на сите негови разговори, телефонски повици и други комуникации што не биле заштитени со привилегија, вклучително и разговори со неговата сопруга и син“, рече таа.
Таа нагласи дека „доказите и обвинувањата се слаби и во правна и во фактичка смисла, и дека тоа го оправдува ослободувањето на Тачи по сите точки од обвинението“.
Одбраната и обвинителството имаат три дена да ги презентираат своите завршни зборови во овој случај, кој е поврзан со главната судска постапка против Тачи и тројца поранешни водачи на Ослободителната војска на Косово (ОВК).
Обвинителството изјави дека, доколку биде прогласен за виновен, Тачи ќе ја отслужи казната за овој случај „по евентуалната казна што ќе му биде изречена во случајот 6, доколку биде изречена“.
Обвинителството, исто така, побара пресуди за вина и затворски казни за другите обвинети.
Беше предложено Хајредин Кучи да биде осуден на девет месеци затвор, додека Фадил Фазлиу, Исни Килај и Башким Смакај треба да добијат по три години затвор.
Два дена по завршните зборови, Тачи, заедно со Кадри Весели, Јакуп Красниќи и Реџеп Селими ќе се појават пред судскиот совет за изрекување на пресудата во судењето за воени злосторства извршени за време на војната во Косово во 1998 и 1999 година.
Обвинителството побара по 45 години затвор за секој од нив. Сите четворица ги негираат обвинувањата.
Специјалната обвинителка Кимберли Вест во својот завршен збор изјави дека Тачи и другите обвинети со месеци се обидувале да влијаат врз сведочењето на сведоците во постапките за воени злосторства и злосторства против човештвото.
„Заедно со своите соработници, тој се обидел да ја наруши оваа постапка со мешање во сведочењето на овие сведоци, но бил фатен. Тој бил фатен од бројни часови снимки и документи што го потврдуваат она што се слуша на снимките“, рече таа.
Вест ги опиша другите обвинети како блиски соработници на Тачи, лојални сојузници и поранешни подредени, тврдејќи дека тој им наложил да контактираат со сведоци чие сведочење, според него, било клучно за случајот за воени злосторства.
Според обвинителката, упатствата вклучувале барања за промена на сведочењето или за поинакво претставување на улогата на Тачи на местата каде што наводно биле извршени злосторствата.
Таа рече дека Тачи формирал мали групи соработници на кои им дал упатства како да ги прилагодат сведочењата на „неговиот наратив“.
Тачи, како и Смакај, Килај, Фазлиу и Кучи, се обвинети за обид да влијаат врз сведочењето на сведоците повикани од обвинителството во случајот за воени злосторства против Тачи и други поранешни водачи на ОВК помеѓу април и ноември 2023 година.
Тачи се соочува со три обвиненија за обид за попречување на службени лица во вршењето на нивните службени должности и осум обвиненија за кршење на тајноста на постапката и непочитување на судот.
Смакај, Килај и Фазлиу се обвинети за еден случај за обид за попречување на службени лица во вршењето на службени должности и еден случај за непочитување на судот. Кучи, од друга страна, се соочува со две обвиненија за непочитување на судот.
Сите петмина се изјаснија за невини.
Судењето започна на 27 февруари, а обвинителството ја заврши презентацијата на доказите на 13 март.
