Претставници на Студентската листа и на студентите во блокада побараа од вработените во различни институции да пријават уништување документација во преодниот период до формирањето на новата власт, како и оставки од раководителите на повеќе институции.
„Ги повикуваме вработените во државните институции, судовите, банките, јавните претпријатија и медиумите да пријават уништување докази. Ве повикуваме да спречите каква било злоупотреба што претставниците на заминувачката власт би можеле да ја направат во преодниот период“, изјави студентот Филип Убовиќ.
На прес-конференција во паркот Пионирски во Белград, пред десетици домашни и странски новинари, тие побараа оставки од раководни лица во повеќе сектори за кои тврдат дека ги прекршувале законите во корист на поранешната власт на Српската напредна партија (СНС). Меѓу нив се полицијата, Безбедносно-информативната агенција (БИА), Воената безбедносна агенција (ВБА), обвинителствата и јавните медиумски сервиси.
Побарани се оставки од директорот на полицијата Драган Васиљевиќ, началникот на Управата за криминалистичка полиција Марко Кричак, командантот на Жандармеријата Радослав Репац, командантот на Специјалната антитерористичка единица Игор Жмириќ, како и од други полициски функционери и претседателот на Уставниот суд, Владан Петров. Студентите побараа и проверка на средствата наменети за проекти.
Тие ги повикаа и јавните обвинителства итно, непристрасно и во согласност со законите да постапат во предметите што предизвикале големо внимание и вознемиреност во јавноста и за тоа да ја информираат јавноста.
Според прелиминарните резултати од предвремените парламентарни избори одржани на 25 октомври, Студентската листа освоила 52,71 отсто од гласовите, односно 140 пратенички мандати и апсолутно мнозинство. Листата на Александар Вучиќ „Обединета Србија“ освоила 39,17 отсто од гласовите и 104 пратенички мандати.
