Синдикатите и студентските организации во Грција денеска организираат национални штрајкови и протести во знак на протест против зголемените трошоци за живот и барањата за поголеми инвестиции во јавното образование, јави агенцијата ДПА.
Според извештаите на медиумите, само во Атина треба да бидат распоредени околу 3.000 полицајци, во обид да се спречат немири слични на оние што се видени во неколку други европски градови.
Учениците и студентите вчера попладне поставија шатори на плоштадот „Синтагма“, пред грчкиот парламент во Атина, како дел од нивниот протест. Нивните барања вклучуваат пониски кирии, повисоки субвенции за домување, повеќе сместување за студентите и дополнителен наставен кадар, пренесува германската агенција.
Вработените во јавниот сектор, исто така, организираат штрајкови по повикот на конфедерацијата на синдикати АДЕДУ.
Од синдикатот изјавија дека акцијата имала за цел да покаже солидарност со протестите во образованието и да им овозможи на вработените, вклучително и на родителите, да учествуваат во демонстрациите и собирите.
Стотици илјади луѓе неделава излегоа на улиците на одделни демонстрации, вршејќи притисок врз владите ширум Европската унија. Демонстрантите излегоа на улиците во одделни, некоординирани демонстрации за да протестираат против зголемените трошоци за живот во нивните земји. Над две илјади демонстранти низ Европа се приведени.
Франција доживеа еден од најтурбулентните денови на протести во последните децении, со повеќе од 550.000 луѓе кои им се придружија на демонстрациите, според Министерството за внатрешни работи, при што полицијата се судри со демонстрантите низ целата земја.
Париз, Марсеј, Лион, Бордо и Лимож беа француските градови во кои стотици илјади жители протестираа против високите животни трошоци и лошите услови во образованието.
Италијанската полиција во Милано во неделата се судри со демонстранти кои фрлаа камења и ограбуваа продавници за време на протестите против лошата состојба со јавните услуги и сè повисоките трошоци за живот. Ова се случи еден ден по сличните немири во неколку италијански градови.Повеќенеделни протести има и во Португалија и Белгија. Во Албанија, пак, ескалираат судирите меѓу полицијата и демонстрантите кои бараат оставка од премиерот Еди Рама и од неговата влада.
Илјадници луѓе во Албанија протестираат секојдневно од 13 октомври – прво во Тирана, а потоа и во други градови. Демонстрациите се поттикнати од незадоволството на студентите од трошоците за образование, условите на универзитетите и недостатокот на економски перспективи.
Протестите брзо се проширија, привлекувајќи граѓани кои се противат на високите трошоци за живот, корупцијата и сегашниот начин на владеење.
