Автоматски пушки, пиштоли, муниција, тактички елеци и пропагандни материјали поврзани со „Исламска држава“ се пронајдени при претреси во Сингелиќ, Чаир и Брест, соопшти Агенцијата за национална безбедност. Според податоците кои ги сподели Агенцијата за национална безбедност меѓу пронајдените предмети има и снајперско оружје и знамиња со обележја на ИСИС.
Претресени биле 12 локации поврзани со шест лица, петмина биле приведени, а против тројца е поднесена кривична пријава, соопшти Министерството за внатрешни работи. Акцијата била спроведена на 28 септември од полицијата и Агенцијата за национална безбедност, под раководство на јавен обвинител. Според претходното соопштение на АНБ, претреси имало во Сингелиќ, Чаир и Брест.
Според кривичната пријава, првоосомничениот К.И. (34) од 2023 година дејствувал во рамки на организација поврзана со идеологијата на ИСИС. МВР тврди дека индоктринирал млади лица, ширел радикална пропаганда и набавувал и ракувал со огнено оружје. Ова се наводи на истражните органи што допрва треба да се докажат во судска постапка.
Полицијата ги сомничи К.И., Б.А. (24) и Е.С. (30) дека формирале група која неовластено поседувала, посредувала и тргувала со оружје и муниција. Кривична пријава за тероризам е поднесена против К.И., додека сите тројца се пријавени за дела поврзани со оружје.
АНБ соопшти дека при претресите биле одземени и компјутерска опрема за „копање“ криптовалути и документација. Агенцијата тврди дека групата е поврзана со транснационални криминални организации и дека постојат сомневања за нејзина вмешаност во насилство, изнуда, киднапирање, лихварство и трговија со дрога и оружје.
Според АНБ, кај дел од членовите е идентификувана поврзаност со радикални проповедници, а дел од приведените биле во контакт со странски терористички борци од земјава и регионот. Агенцијата наведува и сомневања дека млади лица биле радикализирани преку верски објекти и онлајн, а потоа насочувани кон криминални активности. Овие наводи се предмет на истрагата.
Обвинителството за гонење организиран криминал и корупција отвори истрага против тројцата и побара да им се определи притвор од 30 дена. Според Обвинителството, истрагата се темели на докази од предистражната постапка, од друг предмет што веќе се суди и на материјали прибавени преку меѓународна правна помош. Во меѓувреме обвинителот побарал одредување на мерка притвор од 30 дена за приведените.
